Einvígi Hamilton og Alonso verður harðara í ár

Ástralinn Mark Webber sem ekur hjá Red Bull í Formúlu 1, segir að einvígi þeirra Lewis Hamilton hjá McLaren og Fernando Alonso hjá Renault verði harðara en nokkru sinni fyrr á komandi tímabili nú þegar þeir eru ekki lengur í sama liði.

Hamilton og Alonso deildu mikið á síðasta tímabili og skiptust á föstum skotum í fjölmiðlum.

"Það eru litlir kærleikar milli þessara manna og þeir eiga eftir að verða enn grimmari nú þegar þeir aka fyrir sitt hvort liðið. Þetta gæti átt eftir að verða stórkostlegt einvígi," sagði Íslandsvinurinn Webber.

Hann spáir því að Hamilton eigi eftir að verða góður á komandi tímabili, en tippar engu að síður á að Kimi Raikkönen hjá Ferrari muni vinna aftur.

"Lewi er góður og þó bíllinn hans hafi verið mjög góður, var það engu að síður aðdáunarvert hvernig hann hélt í við Alonso. Ég held samt að það verði Kimi sem verður heimsmeistari. Honum og Ferrari-liðinu hefur gengið vel og ég hugsa að hann eigi eftir að njóta sín betur í ár nú þegar hann hefur náð að krækja sér í titil," sagði Ástralinn.