Hnefaleikarinn Ricky Hatton mun mæta í hringinn á ný þann 24. maí næstkomandi þegar hann mætir mexíkóanum Juan Lazcano. Hatton segist vonast til að geta haldið bardagann á City of Manchester Stadium - heimavelli uppáhaldsliðs síns, Manchester City.
"Það jafnast ekkert á við að berjast á heimavelli fyrir framan mitt fólk í Manchester og þar geta enn fleiri af stuðningsmönnum mínum komið og séð mig. Þetta verður ekki um miðja nótt eins og síðast," sagði Hatton í samtali við Sky.
Hann barðist síðast við Floyd Mayweather í Las Vegas í Bandaríkjunum þar sem hann tapaði sínum fyrsta bardaga á ferlinum.
