Stuðningsmenn beðnir að gæta varúðar

Forráðamenn Manchester United hafa farið þess á leit við stuningsmenn félagsins að þeir fari varlega og sýni stillingu í kring um leikina við Roma í Meistaradeildinni í næsta mánuði.

Stuðningsmenn enska liðsins meiddust í átökum við lögreglu þegar liðin mættust á sama stigi í keppninni á síðustu leiktíð og einhverjar uppákomur urðu þegar þau mættust í riðlakeppninni fyrr í vetur.

"Ef stuðningsmenn fara að ráðum okkar og nota rútur sem Roma skaffar okkur, þá ætti allt að geta farið fram vandræðalaust og það er stefna okkar," sagði talsmaður Manchester United.

"Það væri ekki rétt að segja að við höfum engar áhyggjur af þessu, en reynsla okkar af leikjunum í ár var mun betri en í fyrra. Skipulagið í Róm er mun betra nú en það var síðast og nú vita stuðningsmenn okkar betur til hvers er ætlast af þeim."