Örlög að Hamilton vann titilinn

Bretinn Ross Brawn, framkvæmdarstjóri Honda segir að hann hafi ekki upplifað jafn magnþrunginn endasprett og í Brasilíu um síðustu helgi. Brawn var aðal tæknistjórinn á bakvið sjö titla Michael Schumacher á hans ferli.

Það að Hamilton er búinn  að vinna fyrsta meistaratitilinn þýðir að hann verður ekki eins spenntur ef hann kemst aftur í sömu aðstöðu. Mér fannst Hamilton hengdur upp á þráð og það er skiljanlegt," sagði Brawn, en hann er nýr framkvæmdarstjóri Honda liðsins.

"Þetta er mest spennandi endasprettur sem ég hef séð og þetta var frábær dagur fyrir Formúlu 1. Titilinn vannst á heiðarlegan hátt og það var lítið um deilumál á þessu ári sem er vel. Bæði Massa og Hamilton eru frábærir ökumenn og hafa gert íþróttinni gott með framkomu sinni og hegðun í hvítvetna. Sannir íþróttamenn báðir tveir. Það er synd að annar skyldi þurfa að missa af titilinum. Ég tel að það hafi verið örlög Hamiltons að fá þennan titil, tveimur beygjum frá endamarkinu", sagði Brawn.

Hann ákveður í lok nóvember hvort Bruno Senna kemur inn í lið Honda í stað Rubens Barrhichello á næsta ári. Á meðan þarf Barrichello að bíða á hliðarlínunni.