Nauðgaði börnum sínum í mörg ár

Danir eru slegnir yfir því að fjölskyldufaðir á Mön skyldi geta misnotað dóttur sína og stjúpson í mörg ár án þess að upp kæmist. Börnin voru fimm og sjö ára þegar brotin hófust. Maðurinn nauðgaði þeim nánast daglega.

Kennarar við skóla barnanna höfðu átt marga fundi með bæjarstjórninni til að fá hana til þess að rannsaka aðbúnaðinn á heimilinu. Þeir höfðu miklar áhyggjur af börnunum sem voru skítug og illa lyktandi og héldi sig útaf fyrir sig.

Í einu svarinu sem bæjarstjórnin sendi frá sér sagði að hún hefði ekki bolmagn til þess að taka á málinu.

Það komst loks upp um manninn þegar börnin brotnuðu saman á síðasta ári og sögðu móður sinni hvernig ástandið væri. Þá voru þau tekin af heimilinu og fengu aðstoð. Maðurinn var nýlega dæmdur í sjö ára fangelsi.