Messi útilokar ekki að spila gegn Inter

Lionel Messi þykir tæpur fyrir leik Barcelona og Inter í vikunni en hann sagði þó að Barcelona myndi vinna leikinn, með eða án hans.

Messi meiddist í nára í leik Barcelona gegn Athletic Bilbao um helgina en meiðslin eru þó ekki jafn alvarleg og óttast var. Leikurinn við Inter er á morgun og óvíst hvort Messi verði orðinn klár í slaginn í tæka tíð.

„Það er vissulega óheppilegt þegar svona lagað gerist sérstaklega þar sem mig dreymir um að taka þátt í stórleikjum eins og þessum. En við munum vinna hvort sem ég verð með eða ekki," sagði Messi í samtali við spænska fjölmiðla.

„Það skiptir engu gegn hverjum við erum að spila. Við megum ekki gleyma því að við erum Barca og við erum með frábært lið."