Ásgeir er sá sem hefur komist næst úrslitaleiknum

Eiður Smári Guðjohnsen getur í kvöld orðið fyrsti íslenski knattspyrnumaðurinn sem spilar í úrslitaleik Meistaradeildarinnar þegar Barcelona mætir Manchester United í Róm. Eiður Smári byrjar örugglega á bekknum og vonast örugglega ekki til að upplifa það sama og Ásgeir Sigurvinsson gerði fyrir 27 árum síðan.

Ásgeir Sigurvinsson er eini íslenski knattspyrnumaðurinn sem hefur komið nálægt úrslitaleik í Evrópukeppni meistaraliða. Ásgeir sat allan leikinn á bekk Bayern München sem tapaði 0-1 fyrir Aston Villa í úrslitaleiknum í Rotterdam í Hollandi 26. maí 1982.

Bayern München var betri aðilinn í leiknum en óþekktur varamarkvörður varði frábærlega (kom inná á 9. mínútu) og það var síðan Peter White sem skoraði sigurmark enska liðsins á 66. mínútu leiksins.

„Það voru tvöföld vonbrigði fyrir mig að þessi leikur skildi fara svona. Í fyrsta lagi tapaði Bayern og svo fékk ég ekkert að koma inná í leiknum. Tvær skiptingar áttu sér stað hjá okkur en ég var greinilega ekki í náðinni hjá þjálfaranum þetta kvöldið og varð að sitja á bekknum. Yfirleitt hef ég fengið að koma inná í Evrópuleikjum með Bayern en nú brást það," sagði Ásgeir í viðtali við Morgunblaðið daginn eftir.

Ásgeir lék meðal annars báða undanúrslitaleikina á móti ZSKA Sofia og var í byrjunarliðinu í fyrri leiknum í Búlgaríu.

Ásgeir yfirgaf Bayern München um sumarið og gekk til liðs við Stuttgart þar sem hann átti farsælan feril næstu átta tímabil eða þar til að hann lagði skónna á hilluna vorið 1990.