Ketsbaia hættur hjá Olympiakos

Georgíumaðurinn Temuri Ketsbaia er hættur sem knattspyrnustjóri gríska liðsins Olympiakos en á morgun mætir liðið AZ Alkmaar í Meistaradeild Evrópu.

Ketsbaia hefur verið stjóri liðsins í aðeins fáeina mánuði en undir hans stjórn sló lið Anorthosis Famagusta í gegn í Meistaradeild Evrópu á síðustu leiktíð.

Olympiakos hefur hins vegar gengið skelfilega í upphafi tímabilsins í Grikklandi. Liðið gerði markalaust jafntefli við nýliða Kavala í deildinni nú um helgina.

Bosníumaðurinn Bozidar Bandovic mun stýra liðinu tímabundið þar til nýr stjóri verður ráðinn til félagsins.

Þess má geta að Ketsbaia er hetja í augum margra stuðningsmanna Newcastle þar sem hann lék á árunum 1997 til 2000.