Kreppa í Bretlandi

Hagvöxtur dróst saman um 1,5 prósent á síðasta fjórðungi nýliðins árs, samkvæmt nýjustu tölum bresku hagstofunnar frá í gær. Þetta bætist við 0,6 prósenta samdrátt á þriðja fjórðungi og er því kreppa komin að ströndum landsins, samkvæmt helstu skilgreiningum.

Þetta er talsvert meira en markaðsaðilar höfðu reiknað með, að sögn breska viðskiptablaðsins Financial Times. Búist er við að hagvöxtur dragist saman um 2,4 prósent á árinu öllu. Gangi það eftir hafa aðstæður ekki verið verri síðan í seinni heimsstyrjöldinni.

Gengisfall breska pundsins, sem hefur ekki verið lægra gagnvart Bandaríkjadal í 23 ár, á sinn þátt í samdrættinum og bætist við gríðarlega erfiðar aðstæður á fjármagnsmörkuðum, að sögn blaðsins.

Bretar hafa ekki staðið frammi fyrir jafnmiklum vanda í um 29 ár, eða síðan á öðru ári Margaretar Thatcher í stóli forsætisráðherra. Á meðal ráða hennar þá var að draga úr umsvifum hins opinbera í atvinnulífinu. Eitt af ráðum ríkisins nú hafi hins vegar falist í kaupum eða yfirtöku á heilu bönkunum og fjármálafyrirtækjunum og umfangsmikilli innspýtingu fjármagns inn í hagkerfið til að liðka fyrir flæði lánsfjár. - jab