Ronaldo á að vera í Manchester

Jose Mourinho þjálfari Inter Milan segir að landi hans Cristiano Ronaldo hjá Manchester United eigi að vera áfram á Englandi.

Mourinho er nú að gera sína menn klára fyrir leik gegn United í Meistaradeildinni í næstu viku. Ronaldo hefur mikið verið orðaður við Real Madrid undanfarin misseri, en Mourinho virðist ekki vera hrifinn af því.

"Þegar ég var á Englandi vildi ég að bestu leikmennirnir spiluðu þar í landi. Nú er ég á Ítalíu og þá vil ég hafa bestu leikmennina þar. Ég vil alltaf spila í sterkustu deild sem völ er á. Ronaldo er hinsvegar orðinn partur af sögu United og United er partur af sögu Ronaldo. Ég er ekki maður til að ráðleggja mönnum en þegar menn eru að spila fyrir lið sem uppfylla metnað þeirra - titla og einstaklingsverðlaun - af hverju ættu þeir þá að fara annað?" sagði Mourinho.