Ásta dansmeistari í þriðja landinu á ferlinum

Ásta Sigvaldadóttir og dansfélagi hennar Przemek Lowicki eru bestu latin-dansarar Póllands eftir að þau tryggðu sér sigur á pólska meistaramótinu í í samkvæmisdönsum á dögunum. Mótið var haldið í Lublin í Póllandi og var höllin troðfull þegar keppnin fór fram.

Það vantaði ekki samkeppnina í keppni fullorðinna í latin-dönsum því alls tóku 78 pör þátt. Ásta og Przemek fengu 1790 stig í úrslitunum en þau voru einnig með hæstu einkunn inn í úrslitin. Í öðru sæti varð pólska parið Krystian Radziejowski og Sylwia Maczek sem voru 90 stigum á eftir Ástu og Przemek.

Þetta er þriðja landið þar sem Ásta verður meistari en hún og Przemek voru Íslandsmeistarar í fyrra. Ásta hefur einnig unnið sex Danmerkurmeistaratitla á sínum frábæra ferli.

Przemek og Ásta hafa dansað saman í tæplega 2 ár og hafa þau náð saman frábærum árangri. Przemek hætti að dansa með Önnu Stepunina 2007 og sama ár hætti Ásta að dansa með Stephen McCann eftir að þau höfðu dansað saman frá 2005.