Hiddink: Áttum að fá fjögur víti

Guus Hiddink, stjóri Chelsea, var afar svekktur að vonum eftir leik í kvöld en hann var einnig til í að líta í eigin barm.

„Við áttum að fá fjögur víti í þessum leik. Hvað varðar þessa uppákomu í lok leiks þegar allt varð brjálað þá skil ég tilfinningar minna leikmanna vel. Ég mun verja þá út af þessu máli enda var adrenalínið á fullu," sagði Hiddink en norski dómarinn átti alls ekki greiða leið af vellinum í kvöld.

„Ég er auðvitað gríðarlega svekktur og það er ekki auðvelt að greina leikinn þegar adrenalínið er enn að renna. Við hefðum samt átt að skora fleiri mörk því við fengum færin til þess að ganga frá leiknum. Strákunum líður samt illa og finnst þetta ekki sanngjarnt," sagði Hiddink að lokum.