Fletcher hefði líklega verið í liðinu í úrslitaleiknum

Sir Alex Ferguson, stjóri Man. Utd, var afar ósáttur við rauða spjaldið sem Darren Fletcher fékk í kvöld. Sést greinilega á sjónvarpsmyndum að Fletcher nær boltanum áður en hann kemur við Fabregas.

„Það sést greinilega að boltinn er farinn í aðra átt áður en hann kemur við Fabregas. Þetta er svakaleg óheppni og skelfilegt að geta ekki áfrýjað þessum dómi," sagði Ferguson svekktur og ekki síst fyrir hönd Skotans sem verður í banni í úrslitaleiknum.

„Fletcher hefur alltaf verið einn af lykilmönnunum í stóru leikjunum hjá okkur. Ég get ekki sagt hvernig liðið verður í úrslitaleiknum en það er ansi líklegt að Fletcher hafi verið þar á meðal," bætti Ferguson við.