Van Persie og Silvestre æfðu með Arsenal

Framherjinn Robin van Persie og varnarmaðurinn Mikael Silvestre æfðu báðir með Arsenal í dag og verða því væntanlega klárir í síðari leikinn gegn Manchester United í meistaradeildinni annað kvöld.

Báðir hafa þeir átt við meiðsli að stríða undanfarið en þetta eru góð tíðindi fyrir Arsenal sem er 1-0 undir í einvíginu eftir fyrri leikinn.

Van Persie hefur ekki leikið með liði sínu síðan það tapaði 2-1 fyrir Chelsea í undanúrslitum enska bikarsins, en Silvestre meiddist á nára í fyrri leiknum við fyrrum félaga sína í United á Old Trafford.