Meiri líkur á að vinna í lottóinu en að ég verði áfram hjá Bayern

Luca Toni segir að það séu meiri líkur á því að vinna í lottóinu en að hann verði áfram í herbúðum Bayern München. Hann segir að framtíðin sín ráðist á næstu tíu dögum.

Toni hefur lítið fengið að spreyta sig með Bayern í haust og samband hans við Louis van Gaal, knattspyrnustjóra, með versta móti.

Þetta sagði hann á jólasamkomu með stuðningsmönnum Bayern í Suður-Tíról sem er í norðurhluta Ítalíu. „Ég ætla þó ekki að halda áfram að keyra í suðurátt," sagði Toni í léttum tón. „Ég þarf að fara aftur til München og trekkja van Gaal aðeins meira upp. En það er alveg klárt að ég er að fara frá München."