Chelsea áfrýjar úrskurði

Chelsea hefur ákveðið að áfrýja þeim úrskurði að dæma Didier Drogba og Jose Bosingwa í bann í næstu Evrópuleikjum liðsins.

Drogba fékk sex leikja bann og Bosingwa fjögurra leikja bann fyrir framkomu þeirra eftir leik Chelsea gegn Barcelona í undanúrslitum Meistaradeildarinnar í vor. Þeir voru allt annað en ánægðir með dómgæsluna í leiknum.

Drogba lét Tom Henning Övrebö, dómara leiksins, heyra það óspart og Bosingwa kallaði hann þjóf í viðtölum eftir leik.

Chelsea var einnig sektað um 85 þúsund pund fyrir framkomu leikmanna eftir leikinn og mun félagið einnig ætla að áfrýja þeirri ákvörðun.

Sjálfur sagði Drogba áður en úrskurðurinn var birtur að hann ætlaði að una niðurstöðu aganefndar Knattspyrnusambands Evrópu.