Ferguson hrósar Mourinho

Sir Alex Ferguson fer fögrum orðum um Jose Mourinho í fjölmiðlum fyrir viðureign Manchester United og Inter í Meistaradeild Evrópu í næstu viku.

Fyrri leikurinn verður í Mílanó á þriðjudaginn og Sir Alex getur ekki beðið eftir að reyna sig á móti einum harðasta keppinaut sínum á ferlinum.

"Jose er einn besti þjálfari í heimi. Hann er ótrúlegur. Ég hafði heyrt um hann þegar við lékum við Porto árið 2004 en það var ekki fyrr en hann kom til Chelsea og kallaði sjálfan sig Þann Einstaka að ég fór að taka eftir honum," sagði Ferguson og minntist blaðamannafundarins þegar hann tók við Chelsea.

"Fólk tók eftir því þegar hann gaf þessa yfirlýsingu út en hann var þegar búinn að ná góðum árangri. Hann vann Evrópukeppni félagsliða og titla heima fyrir með Porto og svo vann hann Meistaradeildina. Það er meira en að segja það með lið eins og Porto. Svo vann hann tvo titla með Chelsea og ef hann vinnur titilinn aftur með Inter núna, er það heldur betur orðinn góður árangur," sagði Ferguson.