Benitez: Allt sem gat farið úrskeiðis, fór úrskeiðis

Knattspyrnustjórinn Rafa Benitez hjá Liverpool var ekki alls kostar ánægður í leikslok í kvöld eftir 2-0 tap gegn Fiorentina í riðlakeppni Meistaradeildarinnar.

Bæði mörk Ítalanna komu í slökum fyrri hálfleik hjá enska félaginu. Fyrri hálfleik sem Benitez vill helst gleyma sem fyrst.

„Allt sem gat farið úrskeiðis í fyrri hálfleik, fór úrskeiðis. Það sem skiptir máli í fótbolta er að nýta marktækifærin sem þú færð og það gerðu leikmenn Fiorentina og því var þetta mjög erfitt fyrir okkur.

Við vissum að þeir væru vel skipulagt lið sem væri hættulegt í skyndisóknum en við vorum alls ekki á tánum. Við gáfum boltann auðveldlega frá okkur og lögðum þetta í hendurnar á þeim," sagði Benitez í leikslok í kvöld.