Fimmti úrslitaleikur Ferguson

Alex Ferguson mun stýra liði í úrslitaleik í Evrópukeppni í knattspyrnu nú í lok mánaðarins er United mætir annað hvort Chelsea eða Barcelona í Róm.

United vann í gær 3-1 sigur á Arsenal og tryggði sér þar með sæti í úrslitunum.

United hefur titil að verja í keppninni en liðið vann Chelsea í úrslitaleiknum í fyrra. Ferguson stýrði United einnig til sigurs í keppninni árið 1999.

Ferguson varð einnig Evrópumeistari bikarhafa í tvígang - fyrst með Aberdeen árið 1983 og svo United átta árum síðar.

Giovanni Trappatoni hefur komist í flesta úrslitaleikina í Evrópukeppnum eða sjö talsins. Ferguson og sjö aðrir hafa komist í fimm úrslitaleiki en Ferguson er fyrsti Bretinn sem nær þeim áfanga.

Trappatoni hefur unnið flesta Evróputitla sem þjálfari eða fimm talsins og getur Ferguson því jafnað þann árangur í Róm.