Cole: Forskot okkar of mikið fyrir Liverpool

Varnarmaðurinn Ashley Cole hjá Chelsea vill meina að liðið hafi náð svo góðu forskoti á Liverpool í fyrri leik liðanna í Meistaradeildinni að þeir rauðu nái ekki að vinna það upp í þeim síðari.

Liverpool fékk óvæntan 3-1 skell á heimavelli sínum í fyrri leiknum á Anfield í vikunni og þarf því augljóslega á kraftaverki að halda á Brúnni í þeim síðari.

"Við vorum dálítið vonsviknir að ná ekki að skora fjögur eða fimm mörk á þá og margir sögðu að við hefðum geta klárað einvígið strax í fyrri leiknum. Það er alltaf frábært að fara á Anfield og ná góðum úrslitum og það verður gríðarlega erfitt fyrir þá að koma á Stamford Bridge og ná hagstæðum úrslitum," sagði Cole.

"Auðvitað gæti það gerst en við erum með menn í okkar röðum sem geta skorað mörk. Við höfum skorað í öllum leikjum okkar nema einum síðan Guus Hiddink tók við, svo við erum mjög bjartsýnir á að komast áfram," sagði Cole.