Hiddink: Við vorum reiðir í hállfiek

Guus Hiddink, knattspyrnustjóri Chelsea, viðurkennir að menn hafi verið reiðir í búningsklefa liðsins í hálfleik í leik liðsins gegn Liverpool í gær.

Liverpool skoraði tvö mörk í fyrir hálfleik er liðin mættust í síðari viðureign sinni í Meistaradeild Evrópu í gær. Liverpool hefði dugað 3-0 sigur til að komast áfram í undanúrslitin.

„Við vorum reiðir. Sérstaklega vegna þess að við byrjuðum ekki eins og við ætluðum okkur að gera," sagði Hiddink í samtali við enska fjölmiðla eftir leik.

„Við vitum hversu sterkt lið Liverpool er og það þýðir ekki að gefa þeim jafn mikið svæði og við gerðum."

„Við ræddum við leikmenn í hálfleik og það er satt að maður missir stundum stjórn á skapi sínu. En leikmenn vissu vel að þetta var ekki nægilega góð frammistaða."

Leiknum lauk á endanum með 4-4 jafntefli og komst því Chelsea áfram.

„Þetta var einn af þessum leikjum þar sem allir gerðu mikið af mistökum. Það gerði leikinn svo skemmtilegan."