Björn Bergmann skoraði í öðrum leiknum í röð

Björn Bergmann Sigurðarson skoraði eitt marka Lillström í 3-2 sigri á Start í norsku úrvalsdeildinni í fótbolta í kvöld en Lilleström er í 4. sæti deildarinnar eftir þennan dramatíska útisigur.

Björn Bergamann jafnaði leikinn í 2-2 þegar 19 mínútur voru til leiksloka en Start komst í 2-0 eftir aðeins 19 mínútna leik. Arild Sundgot tryggði Lilleström stigin þrjú níu mínútum fyrir leikslok með sínu öðru marki í leiknum.

Þetta er annar leikurinn í röð sem Björn Bergmann er meðal markaskorara Lilleström en hann skoraði eitt marka liðsins í 4-0 sigur á Sandefjord um síðustu helgi.

Stefán Logi Magnússon var í marki Lilleström en hann hafði aðeins fengið á sig eitt mark í síðustu 8 leikjum liðsins fyrir leikinn í kvöld.