Benitez: Við sýndum karakter

Liverpool komst í hann krappann gegn Unirea í Evrópudeildinni í kvöld. Liðið leysti verkefnið að lokum vel af hendi og er komið í sextán liða úrslit keppninnar.

„Við sýndum karakter. Þetta var erfiður leikur því völlurinn var ónýtur. Við urðum því að vera rólegir og klára dæmið almennilega," sagði yfirvegaður stjóri Liverpool, Rafa Benitez, eftir leikinn.

„Um leið og við skoruðum fyrsta markið kom ró yfir mannskapinn og allt varð auðveldara. Annað og þriðja markið kláraði svo eðlilega leikinn.

„Við áttum samt í ákveðnum vandræðum í þessum leik en aðalatriðið var að skora. Við gerðum það og höfðum eftir það stjórnina á leiknum."