Juventus mun bjóða Diego og peninga fyrir Ribery

Juventus er eitt fjölmargra liða sem vill fá Frakkann Franck Ribery í sínar raðir. Juve ætlar að gera Bayern freistandi tilboð í leikmanninn.

Það felur í sér að bjóða Bayern pening og Brasilíumanninn Diego. Bayern reyndi að fá Diego til sín í fyrra en hann stóð sig frábærlega með Werder Bremen.

Hermt er að þetta útspil eigi eftir að hjálpa Juve mikið enda hafa forráðamenn Bayern enn mikinn áhuga á Diego.

Juve þarf þó að hafa fyrir því áfram að landa leikmanninum því risafélög á borð við Man. Utd, Chelsea og Real Madrid vilja einnig fá Ribery.