Ballack mölvaði andlit fyrrum liðsfélaga

Argentínumaðurinn Martin Demichelis kom afar illa út úr samskiptum sínum við Chelsea-manninn Michael Ballack í vináttulandsleik Argentínu og Þýskalands á dögunum.

Þeir lentu í samstuði í leiknum þar sem Ballack braut fjölda beina í andliti Demichelis. Þýski landsliðsfyrirliðinn var þó ekkert að hafa fyrir því að hringja í fyrrum liðsfélaga sinn og biðja hann afsökunar.

„Hann er frábær fótboltamaður en það ekkert hægt að segja það sama um manninn sjálfan. Ég er mjög vonsvikinn með hann því við spiluðum saman í þrjú ár hjá Bayern. Hann hefði minnsta kosti átt að henda á mig kveðju," sagði Martin Demichelis á blaðamannafundi.

Martin Demichelis er farinn að skokka og ætlar að hefja æfingar með Bayern í næstu viku þar sem hann verður með sérútbúna grímu. Hann veit samt ekki hvenær hann byrjar að spila á nýjan leik. Demichelis hélt að hann væri að missa af HM þegar að hann meiddist en nú er hann orðinn bjartsýnni á að ná keppninni.