Fjárhagsleg örlög Grikklands ráðast í næstu viku

Eftir nokkra daga mun ríkisstjórn Grikklands hrinda af stað gífurlegri ríkisskuldabéfaútgáfu. Breska blaðið Financial Times segir að með útgáfunni séu Grikkir að sannreyna lánstraust þjóðar sinnar.

Samkvæmt upplýsingum Finacial Times er þessi útgáfa vel yfir 800 milljörðum kr. Blaðið segir að nýráðning Petros Christodoulou í stöðu eins af seðlabankastjórum Grikklands séu skýr skilaboð til umheimsins um að Grikkir ætli að halda í þessa útgáfu

Vitað er að ESB hefur engan áhuga á að koma Grikklandi til aðstoðar fjárhagslega nema Grikkir skeri verulega niður í ríkisrekstri sínum og það sem meira er gefi út sannar staðreyndir um stöðu þjóðarbúsins.

George Papandreou, forsætisráðherra Grikklands lét hafa það eftir sér í gærdag að Grikkland myndi ekki biðja neinn um peninga, aðeins að þjóðin óskaði að njóta sömu lánakjöra og aðrar evruþjóðir.

Financial Times segir að enn sé ekki vitað á hvaða skilmálum fyrrgreind skuldabréf verði seld en að sérfræðingar í Athenu séu nokkuð sammála um að fjárhagsleg framtíð grískra stjórnvalda muni ráðast í næstu viku.