Framúrskarandi kosningaþátttaka á Akureyri

Kjörsókn á Akureyri hefur verið framúrskarandi góð að sögn formanns kjörstjórnar, Helga Teits Helgasonar, en alls hafa 4452 kosið í bænum. Það gera 34,8 prósent. Í síðustu sveitarstjórnarkosningunum árið 2006 höfðu 32,3 prósent kosið á sama tíma.

Þess má geta að í síðustu alþingiskosningum, vorið 2009, kusu 33 prósent á sama tíma. Því er um frábæra kjörsókn að ræða.

Aðspurður hversvegna Akureyringar flykkjast á kjörstað segist Helgi Teitur engar skýringar hafa á því.

Spurður hvort Akureyringar vilji einfaldlega ekki missa af Euorvision segir Helgi að það komi þá í ljós í kvöld. Ef kjörsókn fellur óeðlilega mikið niður þá, er hugsanlegt að það sé ástæðan.

Annars eru kosningarnar á Akureyri mjög spennandi. Þar, líkt og í Reykjavík, er nýtt framboð óvænt orðið stærsta framboðið í bænum, en það er L-listinn. Þeir mælast með fimm bæjarfulltrúa af ellefu.