Skringi­leg túlkun að hin­segin fáninn sé úti­lokandi

Í viðtali í Sætinu sem birtist á Vísi í gær ræddi Sigmundur Davíð Gunnlaugsson formaður Miðflokksins meðal annars regnbogafánann og þá umræðu sem skapaðist i vor um sýnileika hans. Sigmundur sagði umræðuna hafa komið sér á óvart og sagði einhverja líta á fánana sem þvingandi.

„Sem útilokandi fyrir krakka sem mæta í skólann og vilja bara vera þeir sjálfir og vera eins og þeir eru, útilokandi gagnvart hinu hefðbunda,“ sagði Sigmundur Davíð í Sætinu. 

Sjá einnig: Mikil­vægt að styggja fólk ekki með orða­lagi

Jóhannes Þór Skúlason, stjórnarmaður í Samtökunum 78 segir að rifja þurfi upp að regnbogafáninn standi fyrir að allir séu velkomnir.

„Ég held að sú túlkun sem að hefur því miður komið fram, eitthvað svipað og þetta að hann sé með einhverjum hætti útilokandi fyrir þá sem að ekki tilheyra hinsegin samfélaginu, það er mjög skringileg nálgun á skilaboðin sem regnbogafáninn stendur fyrir og hefur alltaf staðið fyrir,“ segir Jóhannes. 

Hann segir umræðuna hér á landi sé angi af bylgju sem ríði nú yfir Evrópu og Ameríku og sé ekki ný. Mannréttindi eins skyggi ekki á mannréttindi annarra.

„Það er bara mjög sorglegt að það sé verið að færa þetta sérstaklega inn í íslenskt samfélag og íslenska pólitík þegar engin þörf er á því. Gildi hér í samfélaginu að hafa lengi verið að þróast í þá átt að mannréttindi skipti máli og mannréttindi allra skipti máli. Og regnbogafáninn er í raun og veru bara tákn um það.“

Kannanir sýni að um 15-20 prósent nemenda í efri bekkjum grunnskóla og framhaldsskóla sjái sjálfa sig sem hinsegin eða hluta af hinsegin samfélaginu. Þörf sé á að sameinast um að tala um málefnið á grundvelli staðreyndar en ekki grípa falskenningar á lofti.

„Ég held að þeir sem að tala með þeim hætti að það að sjá regnbogafána einhvers staðar í glugga eða fánastöng eða inni í skólastofu ýti þeim út í einhvers konar trend. Það er bara svo furðuleg hugmynd í mínum huga vegna þess að það er ekki tíska að vera hinsegin. Fólk annaðhvort er það eða ekki,“ segir Jóhannes Þór Skúlason, stjórnarmaður Samtakanna 78.