Van Gaal vill fá Dzeko til Bayern

Louis van Gaal vill fá Bosníumanninn Edin Dzeko í raðir Bayern München og er tilbúinn að láta þá Mario Gomez og Anatoliy Tymoshchuk í skiptum. Þessu heldur þýska blaðið Kicker fram í dag.

Dzeko hefur slegið í gegn með Wolfsburg og hefur verið orðaður við AC Milan, Juventus og Manchester City að undanförnu. Wolfsburg er sagt vilja fá um 40 milljónir evra fyrir kappann.

Dzeko hefur skorað 65 mörk í 87 leikjum með Wolfsburg undanfarin tvö ár og er sagður óánægður með núverandi samning sinn hjá félaginu.

Gomez gekk í raðir Bayern á síðustu leiktíð frá Stuttgart fyrir metfé í þýsku úrvalsdeildinni en talið er að hann hafi kostað á bilinu 30-35 milljónir evra.

Tymoshschuk kom einnig til Bayern í fyrra frá Zenit St. Pétursborg en Úkraínumaðurinn er sagður hafa kostað félagið um fjórtán milljónir evra.