Schweinsteiger til í að vera út ferilinn hjá Bayern

Þýski landsliðsmaðurinn Bastian Schweinsteiger er afar hamingjusamur í herbúðum FC Bayern og hefur nú gefið í skyn að svo geti farið að hann klári sinn feril hjá félaginu.

"Ég er með samning til ársins 2012 og ég sé stöðuga, jákvæða þróun hjá félaginu. Ég get vel hugsað mér að vera lengi hjá Bayern og jafnvel út ferilinn," sagði miðjumaðurinn sterki.

Það er léttur Reykás í þessum orðum Schweinsteiger því fyrir ekki svo löngu sagðist hann ekki vera giftur félaginu og gaf í skyn að hann væri til í að reyna fyrir sér annars staðar.

Schweinsteiger lék sinn fyrsta leik fyrir félagið árið 2002. Hann hefur alls spilað 218 leiki fyrir Bayern og skorað í þeim leikjum 23 mörk.