Fabregas: Þetta var góð æfing

Cesc Fabregas á von á því að spila í erfiðari leikjum í vetur en þeim í kvöld er Arsenal vann 6-0 stórsigur á Braga frá Portúgal í Meistaradeild Evrópu.

„Þetta var góð æfing því það koma leikir í ensku úrvalsdeildinni og Meistaradeildinni þar sem þetta verður ekki svona auðvelt fyrir okkur," sagði Fabregas eftir leikinn í kvöld. Hann skoraði tvö mörk og lagði upp tvö til viðbtóar.

Hann var sterklega orðaður við Barcelona í allt sumar og var sagður hafa farið fram á sölu frá Arsenal. En hann lék á als oddi í kvöld.

„Mér hefur alltaf liðið vel hér. Ég er mjög ánægður hér," sagði hann spurður hvort hann væri ánægður með að vera í herbúðum Arsenal.

Hann komst nálægt því að skora þrennu í leiknum en ákvað að gefa á Carlos Vela þegar hann var kominn í ákjósanlegt færi. Vela þakkaði kærlega fyrir sig og skoraði sjötta mark Arsenal.

„Mér hefur aldrei tekist að skora þrennu á mínum atvinnumannaferli og því voru það örlítil vonbrigði að takast það ekki í kvöld," sagði hann.