Van Gaal hættir í lok tímabilsins

Louis van Gaal mun hætta sem knattspyrnustjóri Bayern München í lok tímabilsins en það var tilkynnt á heimasíðu félagsins í dag.

Van Gaal fundaði í dag með þeim Karl-Heinz Rummenigge, framkvæmdarstjóra félagsins, ásamt öðrum forráðamönnum þess.

Niðurstaða þess fundar var að van Gaal myndi láta af störfum í lok tímabilsins en ástæðan er sögð vera óeining um framtíðarstefnu liðsins.

En jafnframt verður nú öll áhersla lögð á að ná „lágmarksmarkmiðum" félagsins á núverandi leiktíð eins og það er orðað í fréttinni.

Bayern er í fimmta sæti þýsku úrvalsdeildarinnar og tapaði á dögunum fyrir Schalke í undanúrslitum bikarsins. Liðið hefur þar að auki tapað tveimur deildarleikjum í röð - nú síðast fyrir Hannover um helgina, 3-1.

Bayern er þó í góðri stöðu í 16-liða úrslitum Meistaradeildar Evrópu eftir 1-0 sigur á Inter í fyrri leik liðanna sem fór fram í Mílanó.