Bayern München ætlar að spila góðgerðaleik í Japan

Þýska stórliðið Bayern München ætlar að fara til Japans eftir tímabilið og spila góðgerðaleik til styrktar fórnarlömbum jarðskjálftans og flóðbylgjunnar í Japan.

Bayern vann tvöfalt og komst í úrslitaleik Meistaradeildarinnar í fyrra en á ekki lengur möguleika á því að vinna titil á núverandi tímabili.

Forráðamenn Bayern eru enn að ræða við japanska knattspyrnusambandið um hvar og hvenær þessi leikur fari fram en hann mun væntanlega fara fram í vikunni 17. til 25. maí.

Karl-Heinz Rummenigge, stjórnarmaður og fyrrum stjarna Bayern München, segir að félagið sjálft muni borga allan ferðakostnað og uppihald og allur ágóðinn af leiknum fari því til styrktar fórnarlambanna.