Dortmund skrefi nær titlinum

Dortmund vann sannfærandi 4-1 sigur á Hannover í þýsku úrvalsdeildinni í dag og er þar með skrefi nær titlinum. Dortmund hafði ekki unnið í tvo síðustu leiki sína og var því sigurinn kærkominn í dag.

Dortmund er með sjö stiga forystu á Leverkusen sem vann 1-0 sigur á Kaiserslautern á útivelli.

Hamburg datt niður í fjórða sæti deildarinnar þar sem að Bayern vann 1-0 sigur á Gladbach í sínum leik og skaust því upp í það þriðja.

Sannarlega mikilvægur sigur fyrir Bayern sem má alls ekki við því að missa af Meistaradeildinni á næsta tímabili. Fjögur efstu liðin í þýsku úrvalsdeildinni komast þangað.

Lucas Barrios skoraði tvö mörk fyrir Dortmund í dag og þeir Mario Götze og Kevin Grosskreutz eitt hvor.

Arjen Robben tryggði Bayern sigur í sínum leik með marki á 78. mínútu. Bæjarar þóttu þó ósannfærandi í leiknum og máttu þakka fyrir stigin þrjú.

Úrslit dagsins:

Dortmund - Hannover 4-1

Bayern - Gladbach 1-0

Bremen - Stuttgart 1-1

Kaiserslautern - Leverkusen 0-1

Mainz - Freiburg 1-1