Neuer samdi loksins við Bayern

Bayern München og Schalke hafa loksins náð saman um félagaskiptin á markverðinum Manuel Neuer. Hann mun formlega ganga til liðs við Bayern þann 1. júlí næstkomandi.

Neuer mun gangast undir læknisskoðun og skrifa svo undir fimm ára samning við Bæjara eftir að landsleikjatörninni lýkur í næstu viku.

„Ég hlakka mikið til að takast á við þessa spennandi áskorun hjá Bayern,“ sagði Neuer í samtali við þýska fjölmiðla.

„Margir af mínum félögum í landsliðinu spila með Bayern. Umhverfið er því ekki nýtt fyrir mér og ég mun aðlagast því fljótt og vel.“

Samningur Neuer við Schalke rennur út næsta sumar en hann hafði þegar tilkynnt að hann ætlaði ekki að framlengja samninginn sinn. Því var ákveðið að selja hann til Bayern og hefur það staðið lengi til.

„Bayern er mög ánægt með að Manuel Neuer hafi gert langtímasamning við félagið. Hann er ekki bara besti markvörður Þýskalands, heldur einn sá besti í heimi.“