Enn ein stjarnan til Katar

Brasilíski knattspyrnumaðurinn Ze Roberto hefur ákveðið að ljúka ferli sínum með Al Gharafa í Katar. Hann skrifaði undir tveggja ára samning við félagið en hann var samningslaus.

Samningur Ze Roberto við Hamburg í Þýskalandi rann út í sumar. Það má segja að það komi Brasilíumaður í Brasilíumanns stað hjá Al Gharafa því Junhinho, sem var á mála hjá félaginu, hefur fært sig til Vasco da Gama í heimalandinu.

Ze Roberto spilaði bæði með Real Madrid og Bayern München á ferlinum. Þá var hann lykilmaður í silfurliði Bayer Leverkusen sem lenti í öðru sæti í deild, bikar og Meistaradeild Evrópu árið 2002.

Ze Roberto sem er 37 ára er einn fjölmargra knattspyrnumanna sem hafa ákveðið að ljúka ferlinum í Katar. Meðal annarra sem hafa gert það eru Stefan Effenberg, Gabriel Batistuta og De Boer bræðurnir frá Hollandi.