Íslenskir tenniskrakkar standa sig vel í Danmörku

Hjördís Rósa Guðmundsdóttir úr BH sigraði í flokki stúlkna 14 ára og yngri á móti í Værlöse í Danmörku í gær. Úrslitaleikurinn var alíslenskur því Hjördís lagði Önnu Soffiu Grönholm úr TFK í úrslitum 6:2 og 7:5. Hinrik Helgason úr TFK komst í úrslit í flokki 16 ára og yngri en beið lægri hlut.

Fleiri íslenskir keppendur náðu góðum árangri í mótinu. Kjartan Pálsson úr TFK komst í undanúrslit í flokki 16 ára og yngri auk þess sem Ástmundur Kolbeinsson úr Víkingi komst í úrslit í flokki 18 ára og yngri.

Tuttugu íslenskir tenniskrakkar eru um þessar mundir við mót og æfingar í Danmörku. Hluti hópsins keppti á mótinu í Værlöse. Mótið í Værlöse er hið fyrsta sem keppt er á en í næstu viku verður keppt bæði í Köge og Espergærde.