Þóra, Sara og félagar áfram með eins stigs forskot á toppnum

LdB FC Malmö og Umeå IK FF gerðu 1-1 jafntefli í toppslag sænsku kvennadeildarinnar í kvöld en liðin eiga í harðri baráttu um sænska meistaratitilinn.

Þóra Björg Helgadóttir stóð í marki LdB FC Malmö en Sara Björk Gunnarsdóttir tók út leikbann í þessum leik. Menon Melis kom LdB FC Malmö í 1-0 á 26. mínútu en Hanna Pettersson jafnaði metin þrettán mínútum síðar og fleiri urðu mörkin ekki.

LdB FC Malmö, sem hefur ekki tapað leik í deildinni í ár, er því áfram með eins stigs forskot á Umeå á toppi deildarinnar en síðan eru fjögur stig í Tyresö sem er í 3. sætinu.

Þetta var hinsvegar þriðja 1-1 jafntefli Malmö-liðsins í röð en LdB FC Malmö og Umeå IK FF gerðu einnig 1-1 jafntefli í Umeå fyrir níu dögum.