Arnór Smárason skoraði sigurmark Esbjerg

Arnór Smárason skoraði sigurmark Esbjerg í dönsku b-deildinni í kvöld. Esbjerg vann þá 2-1 sigur á Vejle Boldklub í toppslag deildarinnar en leikurinn fór fram á heimavelli Esbjerg.

Jesper Lange kom Esbjerg í 1-0 á 26. mínútu leiksins en Jeppe Andersen jafnaði metin aðeins sjö mínútum síðar. Arnór skoraði síðan sigurmarkið sitt á 60. mínútu og kom það með skalla eftir fyrirgjöf.

Arnór skoraði þarna í örðum leiknum í röð en hann skoraði fyrsta mark Esbjerg liðsins í 4-0 útisigri á Skive IK á dögunum.

Sigurinn tryggir Esbjeg fimm stiga forskot á toppnum en Vejle átti möguleika að minnka forskot Arnórs og félaga í eitt stig.