Langþráð mark og sigur hjá Gylfa og félögum - byrjaði fimmta leikinn í röð

Gylfi Þór Sigurðsson lék allan leikinn þegar Hoffenheim vann 1-0 heimasigur á Borussia M'gladbach í þýsku úrvalsdeildinni í fótbolta í dag.

Bosníumaðurinn Vedad Ibisevic skoraði sigurmarkið á 56. mínútu leiksins en þetta var fyrsta mark Hoffenheim í 330 mínútur því liðið hafði ekki skorað í síðustu þremur leikjum sínum.

Gylfi Þór lék á miðjunni í leikkerfinu 4-3-3 en hann var í byrjunarliðinu fimmta leikinn í röð eftir að hafa snúið til baka eftir meiðsli í 6. umferð.

Hoffenheim hafði aðeins náð í eitt stig út úr síðustu þremur leikjum sínum en þessi sigur kom liðinu upp í 6. sæti deildarinnar.