Fimm leikir í röð án sigurs hjá Hoffenheim

Gylfi Þór Sigurðsson var í byrjunarliði Hoffenheim sem tapaði fyrir Bayer Leverkusen, 2-0, í slökum leik í þýskum úrvalsdeildinni í kvöld.

Eren Derdiyok kom Leverkusen yfir strax á tíundu mínútu leiksins og Sidney Sam gulltryggði svo sigurinn með marki ellefu mínútum fyrir leikslok.

Gylfi Þór hafði verið úti í kuldanum hjá Hoffenheim og ekkert spilað með liðinu síðan í lok október. Hann var tekinn af velli tíu mínútum fyrir leikslok en náði sér ekki á strik frekar en aðrir í liði Hoffenheim.

Liðið hefur nú leikið fimm leiki í röð án sigurs í deildinni en liðið er í áttunda sætinu með 20 stig eftir fjórtán leiki.