Dönsk sundkona: Ég stóð mig betur en Wozniacki á þessu ári

Jeanette Ottesen segist vera besta íþróttakona Dana á þessu ári og að hún hafi þar með staðið sig betur en tennisstjarnan Caroline Wozniacki sem endaði árið í fyrsta sæti á heimslistanum.

Jeanette Ottesen varð heimsmeistari í 100 metra skriðsundi á HM í Shanghæ í júlí og vann svo þrjú gull og þrjú silfur á EM í 25 metra laug í desember.

„Ég lít svo á að afrekið mitt sé stærra en það hjá Caroline. Hún er í efsta sætinu á heimslistanum af því að hún tók í svo mörgum mótum, Hún vann hinsvegar engin stór mót á árinu," sagði Jeanette Ottesen.

Wozniacki vann sex mót á árinu og tryggði sér toppsætið á heimslistanum annað árið í röð. Hún er langstærsta íþróttastjarna Dana.

Jeanette Ottesen og Caroline Wozniacki koma báðar til greina sem besti íþróttamaður Dana hjá Ekstra Bladet en þær keppa þar við knattspyrnumanninn Christian Eriksen.