Slys í lýsendaboxinu: „Höndin er brotin“

Nantz og Watt lýstu leik Buffalo Bills við Las Vegas Raiders í gær. Þeir félagar brugðu á leik er Watt, sem var þrisvar valinn varnarmaður ársins í deildinni, sýndi Nantz hvernig leikmenn halda á boltanum til að koma í veg fyrir að þeir missi hann.

Varnarbuffið Watt skoraði þá á Nantz að reyna að slá boltann úr höndunum á sér. Nantz virtist óviss um að taka þessari áskorun en lét svo vaða. Boltinn haggaðist ekki í sterklegum höndum hins 37 ára gamla Watt sem er 196 cm og 130 kíló.

67 ára gamall Nantz hélt hins vegar strax um höndina og sjá mátti á svipnum á honum að hann hafði meitt sig umtalsvert við tilraunina.

„Höndin er brotin,“ sagði Nantz sem var svo kominn með ís á höndina og vafning um hana skömmu síðar.

Í þann mund sem síðari hálfleikur leiksins hófst eftir slys lýsendanna í fyrri hálfleiknum hafði Nantz þó húmor fyrir atvikinu.

„Það var tekist hart á á köflum í fyrri hálfleik,“ sagði Nantz á meðan upphafsspyrna seinni hálfleiks var tekin. „Einhverjir munu þurfa að spila meiddir síðustu tvo leikhlutana.“