Gylfi kom inn á sem varamaður í sigurleik

Gylfi Þór Sigurðsson kom inn á sem varamaður á 84. mínútu er Hoffenheim vann góðan 1-0 útisigur á Schalke í þýsku úrvalsdeildinni í dag.

Isaac Vorsah skoraði eina mark leiksins með skalla af stuttu færi strax á fjórðu mínútu leiksins.

Ryan Babel var í byrjunarliði Hoffenheim og var tekin af velli í blálokin.

Þetta var fyrsti sigur Hoffenheim í þýsku deildinni í síðustu sjö leikjum liðsins en liðið vann síðast 4-0 sigur á Frankfurt í lok nóvember. Hoffenheim er nú í áttunda sæti deildarinnar.

Dortmund er enn með ellefu stiga forystu á toppi deildarinnar eftir 3-0 útisigur á Wolfsburg sem hefur verið í frjálsu falli í Þýskalandi.

Bayern München vann 3-1 sigur gegn Bremen á útivelli eftir að hafa lent 1-0 undir.

Per Mertesacker kom Bremen yfir í upphafi síðari hálfleiks en Arjen Robben jafnaði metin um miðbik síðari hálfleiksins.

Mertesacker skoraði svo sjálfsmark á 76. mínútu áður en Miroslav Klose innsiglaði sigurinn með marki fjórum mínútum fyrir leikslok. Klose kom inn á sem varamaður í síðari hálfleik.

Þetta var fyrsta deildarmark Klose á leiktíðinni en hann skoraði einnig mark fyrir Bayern í Meistaradeild Evrópu í september síðastliðnum.

Hann er þekktari fyrir að skora fyrir landsliðið en hann hefur skorað sex mörk með þýska landsliðinu síðan að tímabilið hófst í Þýskalandi.

Bayern komst upp í fjórða sæti með sigrinum og upp fyrir Hannover sem tapaði, 2-0, fyrir Leverkusen í gær.

Úrslit dagsins:

Wolfsburg - Dortmun 0-3

Bremen - Bayern 1-3

Nürnberg - Hamburg 2-0

Schalke - Hoffenheim 0-1

St. Pauli - Köln 3-0