Ribery verður lengur frá

Svo virðist sem að Franck Ribery muni ekki spila með Bayern München á ný fyrr en um miðjan febrúar í fyrsta lagi.

Ribery var frá vegna meiðsla í tæpa tvo mánuði í haust en meiddist á hné í leik Bayern gegn Wolfsburg fyrir tæpum tveimur vikum síðan.

Læknar Bayern hafa nú fyrirskipað að Ribery hvíli sig algjörlega í fimm daga og er talið að hann verði aftur orðinn leikfær eftir þrjár vikur.

Ribery mun því líklega missa af vináttulandsleik Frakklands og Brasilíu í París þann 9. febrúar. Bayern mætir um helgina Werder Bremen í þýsku úrvalsdeildinni.