Stuðningsmenn Kaiserslautern með Hitler-bendingar

Stjórn þýska félagsins Kaiserslautern hefur tekið fast á máli sem kom upp á æfingu félagsins í gær. Þá mættu nokkrir einstaklingar á æfingu liðsins og móðguðu Ísraelann Itay Shecter, leikmann félagsins.

Þeir voru með Hitler-bendingar og níð í garð Ísraelans sem eðlilega kunni ekki að meta látalætin.

Þessir einstaklingar tilheyra hópi fótboltabullna sem styðja lið Kaiserslautern. Þeir eru allir í margra ára banni frá heimaleikjum liðsins eftir að hafa verið uppvísir af slæmri framkomu á leikjum liðsins í gegnum tíðina.

Kaiserslautern hefur beðið lögregluna um að rannsaka málið og kæra þá sem þarna voru.