Gunnar Heiðar hetja Norrköping

Gunnar Heiðar Þorvaldsson var hetja Norrköping í dag en hann skoraði bæði mörkin í 2-1 sigri á Kalmar í sænsku úrvalsdeildinni.

Kalmar komst yfir í fyrri hálfleik en Gunnar Heiðar jafnaði metin á 62. mínútu og skoraði svo sigurmarkið sjö mínútum fyrir leikslok.

Með sigrinum komst liðið upp í fjórða sæti sænsku úrvalsdeildarinnar en Elfsborg er enn á toppnum. Liðið gerði markalaust jafntefli við Mjällby í dag en er þó með sex stiga forystu á næsta lið.

AIK er í þriðja sætinu eftir 3-1 sigur á Häcken í dag. Helgi Valur Daníelsson lék allan leikinn með AIK.