Leiknismenn sluppu úr botnsæti 1.deildar

Leiknir vann 2-1 sigur á KA fyrir norðan í kvöld í 13. umferð 1. deildar karla og lærisveinar Willums Þórs Þórssonar komust fyrir vikið upp úr botnsæti deildarinnar og hoppuðu alla leið upp í 9. sætið.

Damir Muminovic skoraði fyrra mark Leiknis úr vítaspyrnu á 16. mínútu og Ólafur Hrannar Kristjánsson bætti við öðru marki á 49. mínútu. Gunnar Örvar Stefánsson minnkaði muninn fyrir KA átta mínútum fyrir leikslok.

KA-menn voru taplausir í júlí og áttu með sigri möguleika á því að blanda sér í toppbaráttuna en eru eftir tapið í sjötta sætinu aðeins þremur stigum á undan Leikni.

Upplýsingar um markaskorara eru fengnar af vefsíðunni úrslit.net.