Matthías og Guðmundur skoruðu báðir

Þeir Matthías Vilhjálmsson og Guðmundur Kristjánsson voru báðir á skotskónum þegar að lið þeirra, Start, gerði 3-3 jafntefli við Tromsdalen í norsku B-deildinni í dag.

Start komst þrívegis yfir í leiknum en gestirnir náðu alltaf að jafna metin. Matthías skoraði annað mark Start á 29. mínútu leiksins og Guðmundur kom svo Start í 3-2 forystu um miðjan síðari hálfleikinn.

Start er á toppi deildarinnar með 45 stig eftir 21 leik. Sarpsborg er fjórum stigum á eftir í öðru sæti en á leik til góða.