Jón Guðni og Skúli Jón fengu mínútur í Svíþjóð

Ari Freyr Skúlason var í byrjunarliðinu og Jón Guðni Fjóluson kom inn á sem varamaður í 3-3 jafntefli Sundsvall gegn IFK Gautaborg í efstu deild sænsku knattspyrnunnar í dag. Hjörtur Logi Valgarðsson var í byrjunarliði Gautaborgarliðsins á nýjan leik.

Sundsvall komst í 3-0 en gestirnir minnkuðu muninn stundarfjórðungi fyrir leikslok. Tvö mörk til viðbótar á þremur mínútum tryggði Gautaborgarliðinu sætt stig. Svekkelsið væntanlega mikið í herbúðum Sundsvall sem var með unninn leik í höndunum.

Jón Guðni kom inn á sem varamaður sjö mínútum fyrir leikslok í stöðunni 3-1 fyrir Sundsvall.

Skúli Jón Friðgeirsson kom inn á sem varamaður undir lok leiks Elfsborg og Syrianska sem lauk með 1-0 sigri Elfsborgar. Elfsborg hefur fimm stiga forskot á toppi deildarinnar.

Þá lék Gunnar Heiðar Þorvaldsson allan leikinn með Norrköping sem tapaði 1-0 á heimavelli gegn Gefle.